《底特律：變人》Detroit : Become Human

5月25日發行的 Detroit : Become Human，很快就爆機，不過遊戲會根據玩家對事件發展的選擇影響角色關係及輿論風向，進而引發或不引發特殊事件，而影響遊戲結局。故事主要有三個仿生人主角：Kara（家庭傭工仿生人）Conner（異變仿生人調查專員／仿生人）Markus（看護仿生人）。我只是紀錄一下到現時為止對此遊戲的感想。

嚴重劇透警告！






故事背景在不久的將來，仿生人企業 Cyberlife 賣仿生人就好似依家嘅Apple 賣 iPhone 咁大行其道，每個人都會去買，因為仿生人可以做牛做馬，仲有作為 sex doll 用途，真係賣 seafood 都無得你做，人類飯碗不保。故事由仿生人出現異常行為開始。

以下係三個故事嘅感想（含劇透）：

• Connor係 Cyberlife 派黎調查點解仿生人會有異常行為（仿生人產生人類意識的 bug）。其實佢本身個系統都係會出 bug，不過 Cyberlife 就係利用佢去透過查案收集情報，並且一早加入遙控方式企圖壓制 bug 嘅出現。只要能夠 debug，維持仿生人無人性、只會受人類控制勞役、服從指令，危機就會消失，錢可以繼續穩賺。Conner 嘅故事係要表達人類為了達到目的而偽裝、欺騙、不擇手段，人類都可以好似無 bug 嘅仿生人咁受操控勞役。

• Kara 係家庭傭工，買佢果條佬 Todd，從對話得知之前 Todd 整爛左佢攞返廠維修，但 Kara 記憶被重置所以毫無印象。可惜「人類總要重複相同錯誤」，Todd 因為吸毒令老婆帶埋個女走佬，阿女 Alice 都係仿生人！呢個 point 係玩到中段先有啲暗示，亦係 Kara 呢個故事點樣定義人性嘅關鍵所在。Alice 個盒裡面幅畫，被斷頭果個應該就係之前嘅 Kara。Kara 嘅故事係透過「被需要」來彰顯人性，可以話係一種「我執」，佢明知 Alice 係個仿生人，但因為自己需要一個被需要嘅理由而忽略此一事實，完全投入 Drama 先至覺得自己係生存緊。事件中佢可以選擇只顧自己，定係要顧埋其他人，但我發覺如果揀自私選擇，最後結局都唔好過，好似被迫做好人咁。

• Markus 係個私家看護，照顧一個好出名嘅有錢畫家起居飲食，有錢畫家有個敗家仔累佢被差佬顏射（一槍爆頭）死過翻生之後獲得令仿生人意識覺醒嘅能力（引發 bug）一切都由「公平」呢個概念開始。佢想攪平權，要和理非非定係武裝起義，中間有一個左膠同好勝女友成日左右 Markus 決定，即係好似三國志咁一個軍師叫你要冷靜啲，一個將軍話要衝出去打柒佢，跟住要你話事。其實時勢造英雄，Markus 好似要自主發動革命，但每步都唔確定自己做緊咩，佢成日都得兩個選擇，一係和理非非返屋企，一係殺個片甲不留。可能呢個就係自由嘅代價：為左每個仿生人嘅自由嘅代價。

故事有無感動位呢？如果夠投入應該會有啲感動嘅。之後重玩就難再有咩感動，因為重玩都係好奇睇下揀其他結局會點。其實我覺得故事唔夠人性，唔夠黑暗，而且啲結局好似「好人有好報」你揀得「正確」嘅選擇就有好結果，咁樣太天真、太傻，太唔符合現實吧？所以有無感動位，你情感豐富就會覺得有，你了解現實同人性就唔會特別覺得好感動，仲可能會覺得個劇本膠味濃。

其實講到尾，決定遊戲方向嘅就係各位玩家，身為人類，所謂有人類意識嘅仿生人就係人類意識本身嘅投射，人類自身就有各種面向，可以服從、可以反抗、可以需要或被需要。遊戲可能透過擁有人類意識的仿生人反問何謂人性，如果人類跟仿生人的共同點是「意識」，所謂的「我」跟遊戲主角一樣都是「故事」，人真有自由嗎？我真的存在嗎？

如果呢隻 game 係玩家喺中途開始唔可以控制主角嘅活動，或者可以影響主角行動嘅參數越來越小，我反而覺得更有趣。依家隻 game 雖然好多選項影響唔同結果，始終都有一個既定框架同劇情，想有好結果要選「正確」答案，好快就無癮。